வலைவீட்டில் வெற்றிகரமான மரக்கறி பயிர்ச்செய்கையில் சாதிக்கும் கிளிநொச்சி விவசாயி

இலங்கையில் தற்போது மாறிவரும் காலநிலையை வெற்றிகொண்டு கடந்த 6 மாத காலப்பகுதியில் 3 தடவைகள் வலைவீட்டில் (Net house farming) வெற்றிகரமாக மரக்கறிப் பயிர்ச்செய்கையை செய்து கிளிநொச்சி செல்வா நகரை சேர்ந்த இராஜகோபால் என்கிற விவசாயி சாதித்துள்ளார்.

வலைவீட்டில் சின்ன வெங்காயம், கீரை, பூக்கோவா ஆகியவற்றை வெற்றிகரமாக பயிரிட்டு அறுவடை செய்துள்ளார்.

கடந்த சில தினங்களிற்கு முன்னர் யாழ்ப்பாணத்தில் இருந்து ஒரு தொகுதி விவசாயிகள் வலைவீட்டில் வெற்றிகரமான மரக்கறி பயிர்ச்செய்கை மேற்கொள்ளும் குறித்த கிளிநொச்சி விவசாயியின் தோட்டத்துக்கு களப்பயணம் சென்றிருந்தனர். இதற்கான பயண ஏற்பாடுகளை UNDP நிறுவனம் செய்திருந்தது.

முதலில் குறித்த விவசாயியின் வீட்டில் கிளிநொச்சி விவசாய திணைக்களத்தின் ஏற்பாட்டில் விவசாயிகளுக்கான சிறிய கருத்தமர்வு இடம்பெற்றது. ஓய்வுநிலை உதவி விவசாய பணிப்பாளரும், சிறுவர்களுக்கான அபிவிருத்தி நிலையத்தின் விவசாய ஆலோசகருமான ச. சிவநேசன் தலைமையில் கருத்தமர்வு ஆரம்பமானது.

இந்நிகழ்வில் வளவளராக கலந்து கொண்ட ஆர். சஞ்சீபன் குறித்த விவசாயி தொடர்பிலும் வலை வீடு தொடர்பிலும் பல்வேறு தகவல்களை தெரிவித்தார்.

இவரை முன்னோடி விவசாயி என நாம் ஏன் அழைக்கின்றோம் என்றால், கடந்த பல தசாப்த காலங்களாக விவசாயத் துறையில் வெற்றிகரமாக சாதித்து வருகிறார். இவர் கடந்த ஆண்டு இலங்கையில் விவசாயத்தில் மூன்றாம் இடத்துக்கான NAC விருதினையும், ஜனாதிபதி விருதினையும் பெற்றுள்ளார். இவ்வருடம் NAC இரண்டாம் இடத்துக்கான விருதினையும் பெற்று சாதித்துள்ளார்.

ஏழு ஏக்கர் நிலப்பரப்பில் தனது குடும்ப உறுப்பினர்களை மாத்திரம் பயன்படுத்தி விவசாயம் செய்து வருகின்றார். நீர் பற்றாக்குறை காரணமாக தற்போது 3 ஏக்கர் நிலப்பரப்பில் மட்டுமே விவசாயம் செய்து வருகிறார். அவர் தனியே வலைவீட்டில் மட்டுமல்லாது அதற்கு வெளியிலும் சாதாரண முறையில் பல்வேறு மரக்கறிப் பயிர்களையும் பயிரிட்டுள்ளார்.

இவர் வலைவீட்டில் பிரதானமாக முதலில் கீரையை பயிரிட்டுள்ளார். ஒரு சதுர மீற்றரில் நான்கைந்து பிடிகளைப் பெற்றுள்ளார். 120 சதுர மீற்றரில் மொத்தமாக நானூறு பிடிகளைப் பெற்றுள்ளார். பிடி ஒன்று 30 ரூபாய் வீதம் 12000 ரூபாயினை 35 நாள்களில் வருமானமாக பெற்றுள்ளார். இதனை நாங்கள் வலைவீட்டுக்கு வெளியில் செய்வதாக இருந்தால் 45 – 50 நாள்கள் வரை செல்லும். அடுத்து வலைவீட்டில் சின்ன வெங்காயம் பயிரிட்டு இருக்கிறார். அதன் மூலம் 50 நாட்களில் 45000 ரூபாய் வருமானமாக பெற்றுள்ளார்.

அடுத்து பூக்கோவாவையும் வெற்றிகரமாக பயிரிட்டு கிலோ 150 படி விற்றுள்ளார். பூக்கோவா இலைகளையும் பிடி 20 ரூபாய் படி சந்தைப்படுத்தியுள்ளார்.

பூக்கோவா முற்றிலும் இயற்கை முறையில் பயிரிட்டு இருந்தமை சிறப்பம்சமாகும். இதனை விட கறிமிளகாயும் சிறிய அளவில் பயிரிட்டிருந்தார். இவர் வலைவீட்டுக்கு வெளியே குறைந்தளவு இரசாயனங்களை பயன்படுத்தி மிளகாய், கறிமிளகாய், பயிற்றை, புடோல், வாழை, பாகல் ஆகிய பயிர்களை வெற்றிகரமாக மேற்கொண்டு வருகின்றமை குறிப்பிடத்தக்கது.

வெயில் காலங்களில் வழமையான முறையில் மரக்கறிப் பயிர்ச் செய்கை மேற்கொள்வதில் நிறைய சவால்களை எதிர்நோக்க வேண்டியிருக்கும். ஆனால், இந்த வலைவீட்டில் மேற்கொள்ளும் போது நுண்நீர்ப்பாசன வசதி செய்யப்பட்டுள்ளதால் வெப்பத்தை குறைத்து, பூச்சி தாக்கத்தையும் குறைத்து வெற்றிகரமாக பயிர்ச் செய்கை மேற்கொள்ள முடியும் என்பது நிரூபிக்கப்பட்டுள்ளது.

யாழ்ப்பாணம் கரவெட்டி, அல்லைப்பிட்டியை சேர்ந்த விவசாயிகளும் வலைவீட்டில் வெற்றிகரமாக கீரைப் பயிர்ச்செய்கையை மேற்கொண்டு வருகிறனர்.

வலைவீட்டில் தக்காளி பயிர்ச்செய்கை வெற்றியை கொடுக்கவில்லை என்பதனை இங்கே பதிவு செய்ய வேண்டும். இதற்கான காரணங்களை கண்டறிந்து நிவர்த்திப்பதில் விவசாயத் திணைக்களம் பல்வேறு முயற்சிகளையும் எடுத்து வருகின்றது.

வலைவீட்டில் வெற்றிகரமாக பயிர்ச் செய்கை மேற்கொள்வதற்கான அடிப்படைகள்

* பொருத்தமான ஈரப்பதன் (RH) 60 – 80 % இற்குள் இருக்க வேண்டும்.
* பொருத்தமான வெப்பநிலை 18 – 32 பாகை செல்சியசுக்குள் இருக்க வேண்டும்.
* நல்ல காற்றோட்டத்தை ஏற்படுத்த வேண்டும்.
* நிழல் வலைகளை உபயோகித்து வெப்பத்தையும் சூரிய ஒளியையும் கட்டுப்படுத்த முடியும்.
* தேவையான போது பொலித்தீனால் கூரையை மூடுவதனால் மழையில் இருந்து பாதுகாக்க முடியும்.

வலைவீட்டில் பயிர்ச்செய்கை மேற்கொள்ளும் போது இவ்வருடம் கூடிய பின்னடைவு ஏற்பட்டமைக்கு பிரதான காரணம், ஏப்பிரல் மாதம் எதிர்பார்க்காத அளவுக்கு வெப்பநிலையில் உயர்ச்சி காணப்பட்டது.

திறந்தவெளியில் வெப்பநிலை சராசரியாக 39 பாகை வரைக்கும் சென்று விட்டது. சாதாரணமாக 32 , 33 ஐ மிஞ்சி போவதில்லை. வலைவீட்டுக்குள் வெப்பநிலை 40 பாகை வரை காணப்பட்டது.

வலை வீட்டுக்குள் தண்ணீரை ஸ்பீரே பண்ணும் போது இருந்த வெப்பநிலையை விட 8 – 10 பாகை செல்சியஸ் வெப்பநிலை குறைந்ததை அவதானிக்க முடிந்தது.

வலைவீட்டில் பயிர்ச்செய்கை மேற்கொள்வதில் உள்ள சவால்களாக, எதிர்பாராத காலநிலைமையும், சரியான பயனாளிகளை தெரிவு செய்யாமை, சரியான ஆர்வமின்மை, புதிய தொழிநுட்பம், அறிவுறுத்தல்களை சரிவர கேட்டு பின்பற்றாமை ஆகியன அடையாளம் காணப்பட்டுள்ளன.

இத்தகைய வலைவீட்டு தொகுதிகளை நிர்மாணித்து, தொடர்ச்சியாக கண்காணிக்கும் பணியினை Uthayan Micro Irrigation & Agro Services நிறுவனத்தினர் மேற்கொண்டிருந்தனர். இந்த வலைவீடுகளை வடக்கில் 20 விவசாயிகளுக்கு UNDP நிறுவனம் செய்து கொடுத்திருந்தமை குறிப்பிடத்தக்கது.

jaffna 1

jaffna 1

jaffna 1

jaffna 1

jaffna 1

jaffna 1

jaffna 1

jaffna 1

jaffna 1

jaffna 1

jaffna 1

பாறுக் ஷிஹான்

 

அதிகம் வாசித்தவை

  • Aug 13 , 2017

    அம்பாறை வீரமுனையில் 232 இற்கும் அதிகமான தமிழ் மக்கள் கொன்று குவிக்கப்பட்டு இன்றுடன் 27 ஆண்டுகள் நிறைவை நினைவு கூர்ந்து நேற்றைய தினம் வீரமுனையில் அமைந்துள்ள நினைவுத்தூபிக்கு முன்னால் அஞ்சலி நிகழ்வுகள் இடம்பெற்றன.

  • Apr 16 , 2018

    விளம்பிவருட சித்திரைப் புத்தாண்டை முன்னிட்டு காரைதீவு விளையாட்டுக்க ழகம் நேற்று (15) நடாத்திய சித்திரைப் புத்தாண்டு விளையாட்டு விழாவில் வழுக்குமரமேறிய வீரரொருவர் திடிரென கைதவறியதால் எவரும் எதிர்பாராத வகையில் தரையில் வீழந்து துடிதுடித்தார். இவ்விபத்துச்சம்பவம் காரைதீவு கனகரெத்தினம் விளையாட்டரங்கில் நேற்று (15) நடைபெற்ற சித்திரைப் புத்தாண்டு கலாசார விளையாட்டு விழாவில் இடம்பெற்றது.

  • Apr 25 , 2018

    12ஆம் நூற்றாண்டுக்குரிய சோழர் காலத்திற்குரியதென நம்பப்படும் புராதன ஆலயமொன்று சிதைந்த நிலையில் மடத்தடியில் கண்டுபிடிக்கப்பட்டுள்ளது. அம்பாறை மாவட்டத்தின் நிந்தவூர் பிரிவிலுள்ள மாட்டுப்பளை எனுமிடத்தில் வயல்வெளிகளால் சூழப்பட்டு மனோரம்மியமான சோலைக்கு மத்தியில் அமைந்துள்ள மடத்தடி மீனாட்சி அம்மனாலயத்திற்கு அருகில் இப்புராதன ஆலயம் அமையப்பெற்றிருக்கிறது. இலங்கையின் மிகவும் தொன்மைவாய்ந்த மடத்தடி மீனாட்சிஅம்மன் ஆலயம் மாட்டுப்பழையில் அமைந்திருப்பது குறிப்பிடத்தக்கது. வெகுவாகச் சிதைந்த நிலையில் வயல்வெளிக்கு மத்தியிலுள்ள பரந்த மேட்டு நிலப்பகுதியில் காடுமண்டி இவ்வாலயம் காணப்படுகின்றது. 

  • Apr 18 , 2018

    2017ம் ஆண்டு நடைபெற்று முடிந்த கல்விப்பொதுச்சாதாரணதரப் பரீட்சையில் பட்டிருப்பு வலயத்தின் மண்டூர் 13 விக்னேஸ்வரா மகா வித்தியாலய மாணவர்கள் 37பேர் தோற்றி 33 மாணவர்கள் கல்விப் பொதுத்தராதர உயர்தரம் கற்பதற்குத் தகுதிபெற்றுள்ளனர். அதேவேளை கடந்த நான்கு வருடங்களாக இப்பாடசாலை மாணவர்கள் சித்திரப்பாடத்தில் தோற்றி 100 சதவீதச் சித்தியினைப் பெற்றுச் சாதனை படைத்துள்ளதுடன் இவ்வருடமும் 09A 10B 14C 4S என்னும் சித்திகளைப் பெற்று தங்களின் தொடர் சாதனையைத் தக்கவைத்துள்ளனர்.

  • May 12 , 2018

    இலங்கையில் அம்பாறை மாவட்டம் மாட்டுப்பளை பகுதியிலுள்ள ஸ்ரீ மீனாட்சியம்மன் ஆலயத்துக்கு அருகில் சிதைந்த நிலையில் காணப்படும் கட்டடப் பகுதி, சோழர் காலத்தில் நிர்மாணிக்கப்பட்ட இந்து ஆலயமாக இருக்கக் கூடும் எனும் நம்பிக்கை, அப்பகுதி தமிழர்களிடையே வலுப்பெற்று வருகிறது.